Know Your Rights

ဘာကြောင့် အခွင့်အရေးနဲ့ တာဝန်တွေကို အလုပ်ရှင်ရော၊ အလုပ်သမားရောသိထားသင့်သလဲ။

မိမိတို့၏ အခွင့်အရေးနှင့် တာဝန်များကို သိရှိထားခြင်းသည် အလုပ်ခွင်ဆက်ဆံရေး သဟဇာတဖြစ်စေရန်နှင့် တရားမျှတမှုရှိစေရန် အလွန်အရေးကြီးပါသည်။

အလုပ်သမားများသည် အလုပ်သမားဥပဒေနှင့် ဆက်စပ်လျက်ရှိသော ဥပဒေများတွင်ပါဝင်သည့် ရပိုင်ခွင့်များအကာအကွယ်နှင့် အကျိုးခံစားခွင့်အားလုံးကို ခံစားခွင့်ရှိပါသည်။

🧾 မိမိ၏ အခွင့်အရေးများကို သိရှိထားခြင်းဖြင့် ဥပဒေပါခံစားခွင့်များဆုံးရှုံးမှုမရှိအောင် ကာကွယ်နိုင်ပါသည်။

ထို့အတူ

အလုပ်ရှင်သည် ဥပဒေအရ ချမှတ်ထားသော အခွင့်အရေးများကို သိရှိ၍ လိုက်နာဆောင်ရွက်ခြင်း၊ စနစ်တကျလုပ်ငန်းစီမံခန့်ခွဲခြင်းဖြင့် အလုပ်ရှင်၊ အလုပ်သမားများ ဆက်ဆံရေးတည်ဆောက်ရာတွင် ပိုမိုကောင်းမွန်လာမှု၊လုပ်ငန်းခွင်အေးချမ်းသာယာမှု၊ လုပ်ငန်းစွမ်းဆောင်ရည် တိုးတက်မှုတို့ကို ဦးတည်ဆောင်ရွက်နိုင်မည်ဖြစ်ပါသည်။

🧾 ဥပဒေအရမိမိ၏ အခွင့်အရေးများနှင့် တာဝန်များကို သိရှိကျင့်သုံးခြင်းသည် အလုပ်ရှင်တစ်ဦးအနေနှင့် တာဝန်ယူမှုရှိသောစီးပွားရေးလုပ်ငန်း စီမံခန့်ခွဲမှုကိုဖော်ဆောင်ရာတွင် မဖြစ်မနေလိုအပ်သော လုပ်ငန်းဆောင်ရွက်မှုဖြစ်ပါသည်။

အလုပ်သမားများ၏ အခွင့်အရေးများ

သင့်လျော်သော လုပ်ခလစာရရှိခံစားခွင့်

အလုပ်သမားများသည် ၎င်းတို့လုပ်ဆောင်သည့်အလုပ်အတွက် ဥပဒေအရသတ်မှတ်ထားသော အနည်းဆုံးအခကြေးငွေရထိုက်ခွင့် သို့မဟုတ် ထိုအခကြေးငွေထက်အလုပ်ရှင်ကပို၍ပေးပါက ပိုပေးသည့်အခကြေးငွေကို ရထိုက်ခွင့်ရှိသည်။

လုံခြုံမှုရှိသော လုပ်ငန်းခွင်တွင် အလုပ်လုပ်ကိုင်ခွင့်

လုပ်ငန်းခွင်ဘေးအန္တရာယ်ကင်းရှင်းရေး၍ ကျန်းမာရေးနှင့်ညီညွတ်သော လုပ်ငန်းခွင်၊ လုံခြုံမှုရှိသောလုပ်ငန်းခွင်တွင် အလုပ်လုပ်ခြင်းအတွက် အခွင့်အရေးရှိသည်။ လုပ်ငန်းခွင်ဘေးအန္တရာယ်ကင်းရှင်းရေးနှင့်ပတ်သက်၍ အလုပ်ရှင်ကစီစဉ်ပေးသည့် ဘေးအန္တရာယ်ကင်းရှင်းသော လုပ်ငန်းခွင်သို့ပြောင်းလဲ လုပ်ကိုင်စေမှုအား ငြင်းပယ်ခြင်းမှလွဲ၍ ဘေးအန္တရာယ်ကျရောက်မည့်ဆဲဆဲအခြေအနေတွင် အလုပ်ဆက်လက်လုပ်ကိုင်ရန် ငြင်းပယ်နိုင်သည်။

မတူကွဲပြားမှုများအပေါ် ခွဲခြားဆက်ဆံခြင်းမရှိဘဲ တန်းတူအခွင့်အရေးရရှိခံစားခွင့်

အသင်းအဖွဲ့ဝင်ဖြစ်မှု၊ လူမျိုး၊ ဘာသာ၊ ကျား/မ၊ အသက်အရွယ်ကွာခြားမှုအပေါ်မူတည်၍ ခွဲခြားဆက်ဆံခံရခြင်းမရှိဘဲတန်းတူအခွင့်အရေးရရှိခံစားခွင့်ရှိသည်။

လွတ်လပ်စွာအသင်းအဖွဲ့ ဖွဲ့စည်းခွင့်နှင့် ဝင်ရောက်ခွင့်

အလုပ်သမားများ၏အခွင့်အရေးကို ကာကွယ်စောင့်ရှောက်ရန်၊ အလုပ်သမားအချင်းချင်းအကြား၊ အလုပ်ရှင်နှင့် အလုပ်သမားအကြား ဆက်ဆံရေးကောင်းမွန်စေရန်အတွက် အဖွဲ့အစည်းများကို ဥပဒေနှင့်အညီ ဖွဲ့စည်းဆောင်ရွက်ခွင့်နှင့် ဝင်ရောက်ရန် အခွင့်အရေးရှိသည်။

အချိန်ပိုအလုပ်လုပ်ခြင်းအတွက် အချိန်ပိုကြေးရရှိခံစားခွင့်

အလုပ်သမားများသည် သတ်မှတ်ထားသောအလုပ်ချိန်ထက်ပို၍ အချိန်ပိုလုပ်ကိုင်ရပါက အချိန်ပိုအခကြေးငွေနှုန်းထားကို ဥပဒေအရ သတ်မှတ်သည့်နှုန်းထားအတိုင်းခံစားခွင့်ရှိသည်။ အများပြည်သူအလုပ်ပိတ်ရက်များတွင်လုပ်ကိုင်ရပါက အဆိုပါနေ့အတွက် ဥပဒေပါပြဋ္ဌာန်းချက်အတိုင်း သက်ဆိုင်ရာအခကြေးငွေ သို့မဟုတ် အခြေခံလစာငွေ ပေးမြဲနှုန်း၏ နှစ်ဆရထိုက်ခွင့်ရှိသည်။

နားရက်၊ အလုပ်ပိတ်ရက်နှင့် ခွင့်ရက်ခံစားပိုင်ခွင့်

အလုပ်သမားများသည် သက်ဆိုင်ရာဥပဒေများအရ သတ်မှတ်ထားသော နားရက်ကိုလုပ်ခလစာဖြင့် ခံစားခွင့်ရရှိသည်။ ပြည်ထောင်စုအစိုးရမှ အမိန့်ကြော်ငြာစာဖြင့်ထုတ်ပြန်ထားသော အများပြည်သူအလုပ်ပိတ်ရက်များတွင် လုပ်ခလစာပြည့်ဖြင့် အနားယူခွင့်ရှိသည်။ ထို့အပြင် ဥပဒေနှင့်အညီ သို့မဟုတ် သက်ဆိုင်ရာလုပ်ထုံးလုပ်နည်းနှင့်အညီခွင့်တိုင်ကြားလျှင် ဥပဒေအရသတ်မှတ်ထားသော ခွင့်အမျိုးအစားများကို ရရှိခံစားခွင့်ရှိသည်။ ခွင့်ခံစားနေစဉ်အတွင်း အလုပ်ဌာနနေရာပြောင်းခြင်း၊ ရာထူးအဆင့်လျှော့ချခြင်း၊ လစာလျှော့ခြင်း သို့မဟုတ် အလုပ်မှထုတ်ပယ်ခြင်းမခံရဘဲ အလုပ်အကိုင်တည်မြဲခွင့်ရှိသည်။

ဆွေးနွေးညှိနှိုင်းဆောင်ရွက်ခွင့်

လုပ်ငန်းခွင်နှင့်သက်ဆိုင်သော အငြင်းပွားမှု သို့မဟုတ် သဘောထားကွဲလွဲမှုများရှိပါက နှစ်ဦးနှစ်ဖက်ညှိနှိုင်းဖျန်ဖြေသည့်နည်းဖြင့် ဆွေးနွေးခွင့်၊ အကယ်၍ပြေလည်အောင် ဖြေရှင်းနိုင်ခြင်းမရှိပါက သက်ဆိုင်ရာတည်ဆဲဥပဒေများအတိုင်း ဖြေရှင်းဆောင်ရွက်ခွင့်ရှိသည်။

ကျွမ်းကျင်မှုဆိုင်ရာ ဖွံ့ဖြိုးတိုးတက်ရေးနှင့် လေ့ကျင့်ရေးအစီအစဉ်များတွင် အခွင့်အရေးရရှိခွင့်

အလုပ်သမားများသည် မိမိတို့၏ ကျွမ်းကျင်မှုများတိုးတက်စေရန် ဖွံ့ဖြိုးတိုးတက်ရေးနှင့် လေ့ကျင့်ရေးအစီအစဉ်များတွင် အခွင့်အရေးများရရှိမှု၊ လုပ်ငန်းခွင်ကျွမ်းကျင်မှုဆိုင်ရာသင်တန်းတက်ရောက်ခြင်းနှင့်စပ်လျဉ်း၍ သဘောတူစာချုပ်ကို ဥပဒေနှင့်အညီ ချုပ်ဆိုခွင့်များရှိသည်။ံ

ဥပဒေအကာအကွယ်နှင့် ခံစားခွင့်များရရှိပိုင်ခွင့်

အလုပ်သမားဥပဒေနှင့်ဆက်စပ်လျက်ရှိသော ဥပဒေများတွင်ပါဝင်သည့် ရပိုင်ခွင့်များ အကာအကွယ်နှင့် အကျိုးခံစားခွင့်အားလုံးကို ခံစားခွင့်ရှိသည်။ ဥပဒေနှင့်အညီ တရားစွဲဆိုခွင့်နှင့် တရားစွဲဆိုခံနိုင်ခွင့်ရှိသည်။

အလုပ်ရှင်များ၏ အခွင့်အရေးများ

ခန့်အပ်ခြင်းနှင့် ဖျက်သိမ်းခွင့်

အလုပ်ရှင်များသည် အလုပ်သမားများအား ၎င်းတို့၏အရည်အချင်း၊ ကျွမ်းကျင်မှုအရ ခန့်အပ်ရန်နှင့် လိုအပ်ပါက ရပ်စဲရန်အခွင့်အရေးရှိသည်။

လုပ်ငန်းလုပ်ဆောင်မှုပုံစံနှင့် လုပ်ငန်းခွင်စည်းကမ်းများကို သတ်မှတ်ခွင့်

အလုပ်ရှင်များသည် အလုပ်သမားများအလုပ်လုပ်ကိုင်စေရန်အတွက် အလုပ်ချိန်များသတ်မှတ်ခြင်းနှင့် လုပ်ငန်းခွင်စည်းမျဉ်းစည်းကမ်းများကို သက်ဆိုင်ရာတည်ဆဲဥပဒေများနှင့်မဆန့်ကျင်စေဘဲ သတ်မှတ်လုပ်ကိုင်စေခွင့်ရှိသည်။

လုပ်ငန်းစီမံခန့်ခွဲပိုင်ခွင့်

အလုပ်ရှင်များသည် ၎င်းတို့၏ လုပ်ငန်းစီမံခန့်ခွဲမှုများကို အကောင်းဆုံးလုပ်ဆောင်ရန် အခွင့်အရေးရှိသည်။

လုပ်ငန်းအကျိုးစီးပွားများကို ကာကွယ်ခွင့်

အလုပ်ရှင်များသည် မိမိတို့၏လုပ်ငန်းအကျိုးစီးပွားများကို ကာကွယ်ရန်လိုအပ်သော လုပ်ငန်းဆောင်ရွက်မှုများအား တည်ဆဲဥပဒေများနှင့်အညီ ချမှတ်လုပ်ကိုင်နိုင်သည်။

အလုပ်သမားများကို စည်းမျဉ်း၊ စည်းကမ်းအရ အရေးယူဆောင်ရွက်ခွင့်

အလုပ်သမားများလိုက်နာရမည့် စည်းကမ်းချက်များကို လိုက်နာဆောင်ရွက်မှုမရှိခြင်းကြောင့် အရေးယူဆောင်ရွက်မှုအဆင့်ဆင့်များကို ဆောင်ရွက်ခွင့်နှင့် အလုပ်သမားတစ်ဦးသည် တည်ဆဲအလုပ်သမားဥပဒေများနှင့်အညီချမှတ်ထားသော ကြီးလေးသောပြစ်မှုတစ်ခုခုကို ကျူးလွန်ကြောင်းထင်ရှားလျှင် မည်သည့်နစ်နာကြေးအကျိုးခံစားခွင့်မျှ ပေးအပ်ခြင်းမပြုဘဲ အလုပ်မှရပ်စဲသည်အထိ အပြစ်ပေးခြင်းကို ပြုလုပ်နိုင်သည်။

လိုက်နာမှုရှိစေရန် တောင်းဆိုပိုင်ခွင့်

အလုပ်ရှင်များသည် အလုပ်သမားများကို အဖွဲ့အစည်း၏စည်းမျဉ်းစည်းကမ်းများ၊ ဥပဒေများကို လိုက်နာရန်တောင်းဆိုနိုင်သည်။

အလုပ်သမားများ၏ စွမ်းဆောင်ရည်ကို အကဲဖြတ်ပိုင်ခွင့်

အလုပ်ရှင်များသည် အလုပ်သမားများ၏ စွမ်းဆောင်ရည်ကို အကဲဖြတ်ရန်နှင့် လုပ်ငန်းလုပ်ဆောင်မှုကို ထိန်းချုပ်ရန် အခွင့်အရေးရှိသည်။

လုပ်ခလစာများဆုံးဖြတ်ပိုင်ခွင့်

အလုပ်ရှင်များသည် အလုပ်သမားများ၏ လစာကို ၎င်းတို့၏စွမ်းဆောင်ရည်၊ ဈေးကွက်အခြေအနေများနှင့် အဖွဲ့အစည်း၏ စည်းမျဉ်းစည်းကမ်း လုပ်ထုံးလုပ်နည်းများအရ သတ်မှတ်နိုင်သည်။ သို့သော် လုပ်ခလစာသည် အနည်းဆုံးအခကြေးငွေဥပဒေပါ သတ်မှတ်ချက်များအောက် လျော့နည်းခြင်းမရှိစေရ။

ဥပဒေအရ ဆောင်ရွက်ခွင့်

အလုပ်သမားများ၏ အလုပ်ခန့်ထားမှုဆိုင်ရာသဘောတူညီချက်စာချုပ်ကိုဖျက်သိမ်းခြင်း သို့မဟုတ် အလုပ်သမားများလိုက်နာရမည့် စည်းကမ်းချက်များကို လိုက်နာဆောင်ရွက်မှုမရှိခြင်းများအတွက် လိုအပ်ပါက ဥပဒေနှင့်အညီအရေးယူဆောင်ရွက်နိုင်သည်။ ဥပဒေနှင့်အညီ တရားစွဲဆိုခွင့်နှင့် တရားစွဲဆိုခံနိုင်ခွင့်ရှိသည်။

အလုပ်သမားများ၏ တာဝန်ဝတ္တရားများ

အလုပ်သမားသည် လုပ်ငန်း၏လိုအပ်ချက်အရ ထုတ်ပြန်ထားသော လုပ်ငန်းအန္တရာယ် ကင်းရှင်းရေးဆိုင်ရာ ညွှန်ကြားချက်များကို လိုက်နာဆောင်ရွက်ရမည်။

လုပ်ငန်းခွင်အတွင်းသို့ မဝင်ရောက်မှီ လုပ်ငန်းလိုအပ်ချက်အရ သတ်မှတ်ထားသော လုပ်ငန်းခွင်အကာအကွယ်ပေးရေးပစ္စည်းများကို စနစ်တကျဝတ်ဆင်ရမည်။

လုပ်ငန်းခွင်နှင့် အလုပ်ချိန်အတွင်းမူးယစ်ဆေးဝါးများကို သောက်စားခြင်း၊ လုပ်ဖော်ကိုင်ဖက်များကို စိတ်ငြိုငြင်အောင်နှောက်ယှက်ခြင်း၊ အန္တရာယ်ပေးခြင်း၊ ကိုယ်ထိလက်ရောက် ကျူးလွန်စော်ကားခြင်းများမပြုလုပ်ရ။

အလုပ်ရှင်မှ ကြိုတင်ဖွင့်ဟထားသည့် လျှို့ဝှက်အပ်သော သတင်းအချက်အလက်များကို ပြင်ပသို့ မပေါက်ကြားအောင်ထိန်သိမ်းရမည်။ အခွင့်အမိန့်မရှိဘဲ လုပ်ငန်းနှင့်ဆိုင်သော စာရွက်စာတမ်းများ၊ စာရင်းများ၊ မှတ်တမ်းများကို ထုတ်နှုတ်အသုံးပြုခြင်း၊ ကူးယူခြင်း၊ ဖယ်ရှားခြင်း၊ ဖောက်ဖျက်ခြင်း၊ ပြင်ပသို့ ယူဆောင် သွားခြင်းမပြုရ။

အလုပ်ရှင်နှင့် အလုပ်သမား ကိုယ်စားလှယ်များညှိနှိုင်းသဘောတူညီထားသည့် အခါအားလျော်စွာထုတ်ပြန်ထားသည့် စည်းမျဉ်းစည်းကမ်းများကိုလိုက်နာရမည်။

အလုပ်သမားသည် တည်ဆဲဥပဒေအတိုင်း ထည့်ဝင်ပေးဆောင်ရမည့် အခွန်အခများကို သတ်မှတ်နှုန်းထားများအတိုင်း ပေးဆောင်ရမည်။

တည်ဆဲအလုပ်သမားရေးရာဥပဒေများကိုလေးစားလိုက်နာရမည်။

ဥပဒေနှင့်အညီ တရားစွဲဆိုခွင့်နှင့် တရားစွဲဆိုခံနိုင်ခွင့်ရှိရမည်။

အလုပ်ရှင်များ၏ တာဝန်ဝတ္တရားများ

အသင်းအဖွဲ့ဝင်ဖြစ်မှု၊ လူမျိူး၊ ဘာသာ၊ ကျား/မ၊ အသက်ရွယ်ကွာခြားမှုအပေါ်မူတည်၍ ခွဲခြား ဆက်ဆံခြင်း၊ တန်းတူအခွင့်ရေးမပေးခြင်းတို့ကိုမပြုလုပ်ရ။

မြန်မာနိုင်ငံသို့ လာရောက်အလုပ်လုပ်ကိုင်သည့်နိုင်ငံခြားသား အလုပ်ရှင်များ၊ ကြီးကြပ်သူများ၊ ပညာရှင်များနှင့် မိသားစုဝင်များသည် မြန်မာနိုင်ငံ၏ တည်ဆဲ ဥပဒေများ၊ ယဉ်ကျေးမှုနှင့် ဓလေ့ထုံးစံများကို လေးစားလိုက်နာမည်။